Виртуелниот кампус на три високообразовни институции од Македонија, Словенија и Турција спроведе истражување на пазарот во овие држави, чии сознанија ќе се користат како почетна точка за развој на заедничката онлајн програма за професионален развој за иновативен менаџмент, лидерство и стратегиски комуникации – e-PROFMAN.

Високата школа за новинарство и за односи со јавноста од Македонија, Факултетот ДОБА од Словенија и Универзитетот Истанбул од Турција ќе ги искористат наодите од истражувањето за анализа на окружувањето, конкуренцијата на пазарот и образовните политики во трите држави, како и да ги применат најдобрите практики на слични студиски програми во Европа и во светот.

Со онлајн анкета беа утврдени личните професионални потреби на испитаниците и потребите на организациите во приватниот, невладиниот и јавниот сектор кои се однесуваат на знаење и вештини на нивните вработени за управување, водство и комуницирање. Преку деск истражување, пак, беа анализирани образовните институции кои нудат формални и неформални студиски програми, како и доживотно и онлајн учење во областа на менаџментот, лидерството и комуникациските студии и односи со јавноста.

Резултатите од истражувањето ќе бидат искористени во процесот на развивање на наставните програми за онлајн курсевите на заедничката програма.

e-PROFMAN е проект финансиран од Европската унија преку Програмата ЕРАСМУС+.