Студентите од втора година на насоката новинарство направија ТВ емисија во која разработуваат теми за економијата во Македонија. Емисијата „Епицентар“ е финална вежба која ги сублимира знаењата и вештините стекнати по предметот ТВ новинарство и Известување за економија во текот на летниот семестар.

„Иако ова е аматерски студентски труд, содржината на прилозите, успехот да се најдат соговорници кои често се недостапни за јавноста и максималната ангажираност на студентите за овој труд, е навистина дело на кое може да му позавидат и активните економски новинари“, рече на часот предвиден за фидбек на емисијата  професорот Крсте Шајноски кој го предава предметот Известување за економија. На иста линија е и Александра Теменугова која во текот на семестарот заедно со Елена Петреска го предаваа предметот ТВ новинарство. „Емисијата остава минимален простор за критики кои се однесуваат на техничките и продукциските моменти. Но, земајќи предвид дека ова е прва емисија на група млади луѓе кои за неколку месеци учеа да пишуваат за телевизија, сами да монтираат, сами да снимаат, па дури и сами да прават најавни шпици и одјави, мислам дека ги оправдавме целите и задачите предвидени во наставната програма за предметот ТВ новинарство“, вели Теменугова.