Високата школа ќе ги промовира трите студии од истражувачката едиција „Res Public“ и ќе ги додели првите дипломи за завршени студии во понеделник од 12 до 14 часот во ЕУ Инфо центарот.

Последната едиција на Високата школа ги истражува начините на кои медиумите известуваат за различностите, религиските и етничките прашања, како и влијанието врз јавноста кое го креираат информирајќи за овие теми. Едицијата е составена од три научни студии во авторство на тим предавачи од Високата школа и докажани истражувачи во областа на медиумите:

• Различностите низ призмата на редакциите: Поглед одблизу врз создавањето на вестите од Љубомир Јакимовски, Елена Петреска, Сефер Тахири, Елеонора Серафимовска, Снежана Трпевска и Жанета Трајкоска;
• Известувањето за меѓурелигиските и меѓуетничките тензии во Македонија: Значењето зад насловите од Весна Шопар, Снежана Трпевска, Жанета Трајкоска, Игор Мицевски и Миша Поповиќ и
• Известување од паралелни светови: Медиумите на заедниците во Македонија од Снежана Трпевска, Жанета Трајкоска и Игор Мицевски.

На настанот ќе бидат врачени првите дипломи за завршени студии на студенти од двете студиски програми на Високата школа: Новинарство и Корпоративни комуникации и односи со јавноста.