Eкспертски панел составен од претставници на аудиовизуелната индустрија изготви предлог-рамка за зајакнување на постојните и поттикнување на нови аудиовизуелни индустрии во Македонија. Документот содржи насоки за поддршка и развој на филмот, телевизијата и видео игрите, како сегменти на аудиовизуелната дејност.

Во стратешката рамка се предложени мерки и политики за поттикнување на претприемништвото, регулирање на дејноста, професионално и институционално поврзување, финансирање, образование и за следење и ажурирање на податоците за аудиовизуелната област.

Нацрт текстот ќе биде претставен на конференција кон крајот на јануари и ставен на јавно разгледување и дополнување од страна на сите засегнати страни во аудиовизуелната индустрија.

Заедничката стратешка рамка се носи во рамки на проектот „Мерење на економскиот придонес на аудиовизуелните индустрии во Република Македонија“, што го спроведува Катедрата на УНЕСКО при Високата школа за новинарство и за односи со јавноста.