Високата школа беше дел од работилницата на тема „Развој на стратегии за доживотно учење и мобилност“, организирана од Универзитетот Џелал Бајар од Маниса, Турција. Работилницата беше организирана како дел од програмата на Европската Комисија за студиски посети, во чии рамки претставникот на Високата школа беше единствениот учесник од Македонија.

Посетата имаше цел да ја продлабочи соработката помеѓу земјите од Европа во областа на доживотното учење, како и размената на студенти и наставен кадар, во рамките на образовните програми на Европската Комисија (Еразмус, Леонардо да Винчи и др.). Меѓу повеќето учесници од европски реномирани универзитети и организации, генералниот секретар на Високата школа, Бојан Георгиевски, одржи презентација за системот на високо образование во Република Македонија и искуствата на Високата школа во размената на студенти и наставен кадар.

Студиските посети на Европската Комисија служат за олеснување на трансферот на знаење помеѓу високообразовните институции како и за понатамошно развивање на мобилноста, како една од најважните алатки за подобрување на квалитетот на високото образование.