Техниките на јавно обраќање во услови на криза и ризични околности и добрите практики на работа со традиционалните и новите медиуми беа дел од темите на работилницата наменета за регионалните портпароли на Министерството за внатрешни работи, претставници на Секторот за односи со јавноста на МВР и други полициски службеници одговорни за комуникација со јавноста.

Со симулирање на кризни ситуации, странски и домашни експерти ги обучуваа учесниците како да креираат соодветни пораки за одговор кон јавноста и кои техники и алатки за комуникација треба да ги применат.

Работилницата се организираше изминатите два дена во Охрид, во соработка со мисијата на ОБСЕ во Македонија, а како дел од проектот за зајакнување на институционалните капацитети и ефикасноста на МВР во унапредувањето на полициските практики.

Во реализацијата на работилницата учествуваа Пеѓа Ашанин Голе, експерт по односи со јавноста од Словенија и Марина Тунева и Јасмина Миронски, предавачи на Високата школа.